Қазақстандағы ТОП20 ЖОО қатарына кіретін Нұр-Мүбарак университетінің жаңа ғимаратының не үшін салынып жатқанын айтпас бұрын университеттің өзімен қысқаша таныстыра кетейік. Нұр-Мүбарак ЕИМ университеті – Қазақстан мен Египет Араб Республикасының арасындағы тығыз ынтымақтастықтың нәтижесінде 1993 жылы негізі қаланған жоғары білім ордасы. Бұл университет еліміздегі исламтану, дінтану, араб және ағылшын тілі мамандарын даярлайтын бірегей оқу орны болып табылады. Студенттер үшін оқу кешенінің тар болуы, білім алу үшін қажетті жағдайлардың жетіспеушілігі жаңа ғимараттың салынуын талап етті. Осыған орай, «Білім-Қазына» қоғамдық қорының бастамасымен және «Жаһан-LTD» құрылыс компаниясымен бірлесе отырып, жаңа оқу ғимаратының құрылыс жобасы қолға алынды. Жаңа 9 қабатты ғимарат 30 мың шаршы метр аумақты қамтитын кеңістік болады. Онда заманауи оқу аудиториялары, зертханалар, спорттық және демалыс алаңдары орналастырылады. Университеттің жаңа ғимараты ислам ғылымдарының дамуына үлкен үлес қосып, білім мен мәдениетті насихаттауға бағытталған болады. Жаңа оқу кешенінің арқасында студенттер мен оқытушыларға заманауи, қолайлы және тиімді орта ұсынылады. Еліміздегі жалғыз ислами жоғары оқу ордасының құрылысы ел көмегі мен жомарт жандардың демеушілігі арқылы салынбақ. Сол үшін әрбір азаматтың осы бастамаға қосқан үлесі еліміздің білім беру жүйесінің дамуына, болашақтағы білікті мамандар мен саналы ұрпақ тәрбиелеуге маңызды әсерін береді.